काठमाडौं । नेकपाभित्र देखिएको विवाद समाधानका लागि गठित कार्यदलको बैठक आज वस्दैछ ।

नेकपाका अध्यक्षद्वय केपी शर्मा ओली र पुष्पकमल दाहाल प्रचण्डबीचको सहमतिमा गठित ६ सदस्यीय कार्यदलले पार्टी भित्रका विवाद समाधानका लागि आजबाट काम सुरु गर्न लागेको हो ।

पार्टीका महासचिव विष्णु पौडेलको संयोजकत्वमा गठन गरिएको कार्यदललाई पार्टी विवाद समाधान खोज्ने जिम्मेवारी दिइएको छ ।

अध्यक्षद्वयको सहमतिपछि महासचिव पौडेलको नेतृत्वमा शंकर पोखरेल, जनार्दन शर्मा, पम्फा भुसाल, सुरेन्द्र पाण्डे र भीम रावल सदस्य रहेको कार्यदल गठन गरिएको थियो ।

कार्यदलले पार्टीभित्र देखिएका समस्या पहिचान गर्दै समाधानका उपायसहित अध्यक्षद्वयलाई प्रतिवेदन बुझाउने छ । कार्यदलले समाधान दिन्छ भन्नेमा नेताहरु भने विश्वस्त छैनन ।