कोरोना भाइरसविरुद्धको खोप सन् २०२०को अन्तिमसम्म तयार हुनसक्ने विश्व स्वास्थ्य संगठन (डब्ल्यूएचओ)ले आशा व्यक्त गरेको छ ।

डब्लूएचओका महानिर्देशक टेड्रोस एडह्यानम गिब्रिएससले यसैवर्षको अन्तिमसम्ममा कोरोनाको खोप उपलब्ध हुनसक्ने सम्भावना भएको आशा व्यक्त गरेका हुन् ।

‘कोरोनाको खोप चाहिन्छ’, गिब्रिएससले भने, ‘यसैवर्षको अन्तिमसम्ममा खोप हामीमाझ उपलब्ध हुने विश्वास छ ।’

गेब्रेयेससले खोप उपलब्ध भएसँगै खोपको बराबरी वितरण सुनिश्चित गर्न सबै नेताहरूबाट एकता र राजनीतिक प्रतिबद्धता जनाउनुपर्ने बताएका छन् ।

कोरोनाविरुद्धको खोप निर्माणका लागि डब्ल्यूएचओले कोभ्याक्स कार्यक्रम अघि सारेको छ ।

नौ खोप उम्मेद्वारहरू परीक्षणको विभिन्न चरणमा पुगेका छन् भने कोभ्याक्स कार्यक्रमअन्तर्गत सन् २०२१ को अन्तिमसम्ममा विश्वभर दुई अर्ब डोज खोप वितरण गर्ने लक्ष्य लिइएको छ ।

कोभ्याक्स कार्यक्रममा विश्वमा एक सय ७२ देशहरू जोडिएका छन् । अभियानमा अमेरिका, चीन र रुसले भने सहभागिता जनाएका छैनन् ।