बुटवल

बुटवल उपमहानगरपालिकाका नगर प्रमुख खेलराज पाण्डेयले बुटवलबाट प्रदेश राजधानी दाङ सारिएपछि यस क्षेत्रकाे होटल व्यवसाय खस्किएको बताएका छन् ।

शनिबार बुटवलमा आयोजित होटल व्यवसायीहरूकाे कार्यक्रममा बोल्दै उनले बुटवलबाट प्रदेश राजधानी सारिएपछि यस क्षेत्रकाे होटल व्यवसायमा धक्का लागेको बताएका हुन् । यहाँबाट राजधानी सरे पनि व्यवसायीको हौसलाले बुटवलको व्यापारमा केही कमि आए पनि चलिरहेको उनलेे बताए ।

बुटवल सम्भावनाको शहरकाे रूपमा विकास हुँदै गएको भन्दै उनलेे यहाँका होटल व्यवसायीले आत्मनिर्भर योजना अघि सार्नुपर्नेमा जोड दिए ।

आन्तरिक तथा बाह्य पर्यटकलाई बुटवलमै राख्न सकिने गरी आकर्षक टुर प्याकेज निर्माण गर्न समेत उनलेे व्यवसायीलाई सुझाव दिए ।

सोही कार्यक्रममा उपप्रमुख सावित्रा देवी अर्यालले भारतबाट मुक्तिनाथ पुग्ने तीर्थयात्रीहरूका लागि बुटवल विश्रामस्थलको रूपमा विकास गर्नुपर्ने धारणा राखिन् ।