काठमाण्डौ – इलामका विभिन्न स्थानमा गएको पहिरोका कारण कम्तीमा १८ जनाको ज्यान गएको छ। कोशी प्रदेश प्रहरी कार्यालयका प्रवक्ता एसएसपी दीपक पोखरेलका अनुसार इलामको माङसेबुङ, सूर्योदय, देउमाई, फाकफोकथुम गाउँपालिका र इलाम नगरपालिकामा ठूलो जनधनको क्षति भएको हो।

प्रहरीका अनुसार इलाम नगरपालिका–५ घोसगाउँमा ६ जना, सूर्योदय नगरपालिका–१ मानेभञ्ज्याङमा ५ जना, माङसेबुङ गाउँपालिका–१ पाटीगाउँमा ३ जना, देउमाई नगरपालिका–५ धारेमा १ जना र त्यही नगरपालिकाको धुसुनेमा २ जना तथा फाकफोकथुम गाउँपालिका–३ रातमाटेमा १ जनाको मृत्यु भएको छ।

माङसेबुङ गाउँपालिकामा थप दुई जना गम्भीर घाइते भएका छन्। उनीहरुलाई उपचारका लागि लैजाने तयारी भए पनि लगातारको वर्षा र खराब मौसमका कारण हेलिकप्टर जान नसकेको प्रहरीले जनाएको छ।

उद्धार तथा राहत कार्यमा सशस्त्र प्रहरी, नेपाल प्रहरी र स्थानीय बासिन्दा खटिएका छन्।