काठमाण्डौ , प्रधानमन्त्री सुशीला कार्कीले आफ्नो सचिवालय तथा विज्ञ समूहको आकार घटाउने निर्णय गर्नुभएको छ । प्रधानमन्त्री तथा मन्त्रिपरिषद्को कार्यालयका प्रवक्ता हेमराज अर्यालको विज्ञप्ति अनुसार अब सचिवालयमा ६ जना मात्र रहनेछन् ।

सचिवालयमा मुख्य सल्लाहकार एक, जनसम्पर्क सल्लाहकार एक, प्रमुख स्वकीय सचिव एक, प्रेस संयोजक एक, स्वकीय शाखा अधिकृत फोटोग्राफर एक र जनस्वास्थ्य विज्ञ अवैतनिक एक गरी ६ जना मात्र कायम राखिएको विज्ञप्तिमा उल्लेख छ ।

बाँकी सबै नियुक्ति प्रधानमन्त्री कार्कीले आजदेखि लागू हुनेगरी खारेज गर्नुभएको छ । यस अनुसार प्रमुख स्वकीय सचिव आदर्श श्रेष्ठ कायम रहनुभएको छ भने श्रीमती संगीता श्रेष्ठलाई हटाएको छ ।

प्रधानमन्त्रीका स्वकीय सचिव आदर्श श्रेष्ठले श्रीमती संगीतालाई सचिवालयमा नियुक्ति गरेको सार्वजनिक भएपछि प्रधानमन्त्री कार्की विवादमा पर्नुभएको थियो ।

प्रधानमन्त्रीको सल्लाहकार र सचिवालय व्यवस्थापन कार्यविधि २०७४ एघारौँ संशोधन २०८१ अनुसार प्रधानमन्त्रीको सचिवालयमा विभिन्न पदका ६६ जनाको दरबन्दी कायम रहेको छ ।