मुगु ,मुगुका युवाले दुर्गम क्षेत्रमा अझै पनि प्रभावकारी इन्टरनेट र मोबाइल सेवा नपुगेको र सरकारको १०० कार्यसूचीमा यसबारे उल्लेख नगरिएको भन्दै सरकारको ध्यानाकर्षण गराएका छन् ।

युवा आशिष देवकोटाको नेतृत्वको टोलीले सूचना तथा सञ्चार प्रविधि मन्त्री विक्रम तिमल्सिनासँग भेट गरी मुगुको वास्तविक अवस्था, भौगोलिक समस्या र समाधानका उपायसहित सुझाव राखेको हो । तथ्यांकअनुसार मुगुमा रहेका २४ टेलिकम टावरमध्ये अहिले १२ वटा मात्र सञ्चालनमा छन् भने बाँकीमा कमजोर नेटवर्ककै भर गर्नुपर्ने नागरिकको बाध्यता छ ।

धेरै नागरिक अझै डिजिटल सेवाबाट वञ्चित रहेको अवस्थाबारे युवा टोलीले मन्त्री तिमल्सिनाको ध्यानाकर्षण गराएको छ । मन्त्रालयमा बुझाएको ज्ञापनपत्रमा मुगुका झण्डै ९५ प्रतिशत नागरिक भरपर्दो इन्टरनेट सेवाबाट वञ्चित रहेको, गाउँसम्म सरकारी सूचना नपुगेको तथा सेवा विस्तारमा प्राथमिकता नदिएको उल्लेख छ ।

कतिपय ठाउँमा मोबाइल सिग्नल पाउन डाँडामै पुग्नुपर्ने बाध्यता रहेको हुँदा सुधारको माग गरिएको देवकोटाले बताउनुभयो । भेटका क्रममा युवाहरूले प्रतीकात्मक रूपमा पुरानो नोकिया मोबाइल फोन मन्त्रीलाई उपहार दिएका थिए । तर मन्त्री तिमल्सिनाले उपहार अस्वीकार गर्नुभएको पनि देवकोटाले जानकारी दिनुभयो ।

मन्त्री तिमल्सिनाले अहिले देशभर झण्डै १ हजार २०० वटा टावरमार्फत फोर–जी सेवा सञ्चालनमा रहेको र थप तीन हजार टावर निर्माण गर्ने प्रक्रिया अघि बढाइएको जानकारी गराउनुभएको छ ।