बुटवल । पाल्पामा जङ्गली च्याउ खाँदा दुई जनाको मृत्यु भएको छ भने एक जना गम्भीर बिरामी परेका छन्। जिल्लाको रम्भा गाउँपालिका वडा नं. ५ फलकुन बस्ने स्थानीय बासिन्दाहरू जङ्गली च्याउ सेवनका कारण बिरामी परेका हुन्।

जिल्ला प्रहरी कार्यालय पाल्पाका अनुसार गत जेठ १ गते बेलुका अन्दाजी १८:०० बजे जङ्गलबाट ल्याएको च्याउ खाएपछि उनीहरू बिरामी परेका थिए। च्याउ खाएको भोलिपल्ट (जेठ २ गते) बिहानैदेखि लगातार बान्ता र झाडापखाला लागेपछि उनीहरूलाई उपचारका लागि युनाइटेड मिसन अस्पताल, तानसेन ल्याइएको थियो। अस्पतालमा औषधी उपचारकै क्रममा दुई जनाको ज्यान गएको प्रहरीले जनाएको छ। मृत्यु हुनेमा ६६ वर्षीया बिनीमाया कामु मगरको जेष्ठ ४ गते युनाइटेड मिसन अस्पतालमा मृत्यु भएको हो भने ३५ वर्षीया बालकुमारी खाम्चा मगरको सोही अस्पतालमा ५ गते मृत्यु भएको हो ।

च्याउ खाई बिरामी परेकी सोही स्थानकी ५० वर्षीया यममाया जर्घा मगरको अवस्था भने अझै गम्भीर (सिरियस) रहेको छ। उनको हाल युनाइटेड मिसन अस्पताल तानसेनमै उपचार भइरहेको जिल्ला प्रहरी कार्यालय पाल्पाका सूचना अधिकारी प्रहरी नायव उपरीक्षक भीमलाल भट्टराईले जानकारी दिएका छन् ।