काठमाडौं । नेपाली नागरिकलाई नक्कली भुटानी शरणार्थी बनाई अमेरिका पठाउने ठगी प्रकरणमा कसुरदार ठहर भएका प्रतिवादीहरूको सजाय निर्धारणका लागि काठमाडौं जिल्ला अदालतले आज पेसी तोकेको छ

यसअघि काठमाडौं जिल्ला अदालतका न्यायाधीश तेजबहादुर खड्काको इजलासले पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणसहितका प्रतिवादीहरूलाई दोषी ठहर गरेको थियो। अदालतले ती कसुरदारहरूलाई कति वर्ष जेल सजाय र कति जरिवाना गर्ने भन्ने विषयको टुंगो लगाउन असार २९ गते (आज)का लागि छुट्टै पेसी तोकेको हो।

नेपालको फौजदारी कसुर (सजाय निर्धारण तथा कार्यान्वयन) ऐन, २०७४ अनुसार ३ वर्षभन्दा बढी कैद सजाय हुन सक्ने गम्भीर प्रकृतिका मुद्दामा कसुर ठहर भएको ३० दिनभित्र सजाय निर्धारणका लागि अनिवार्य रूपमा छुट्टै सुनुवाइ गर्नुपर्ने कानुनी व्यवस्था छ। सोही कानुनी प्रावधानबमोजिम अदालतले जिल्ला सरकारी वकिल कार्यालय र प्रतिवादीका कानुन व्यवसायीहरूलाई सजाय पूर्वको प्रतिवेदन (Pre-sentencing Report) र अन्य आवश्यक प्रक्रिया पूरा गरी उपस्थित हुन आदेश दिएको थियो।

यस बहुचर्चित प्रकरणमा अदालतले पूर्वउपप्रधानमन्त्री टोपबहादुर रायमाझी, गृह मन्त्रालयका पूर्वसचिव टेकनारायण पाण्डे र पूर्वगृहमन्त्रीका सुरक्षा सल्लाहकार डा. इन्द्रजित राईलाई मुख्य कसुरदारका रूपमा दोषी ठहर गरेको छ। त्यस्तै, पूर्वगृहमन्त्री बालकृष्ण खाँण र भुटानी शरणार्थी नेता टेकनाथ रिजालसहितका अन्य व्यक्तिहरूलाई अपराधको मतियार (मत दिने वा सघाउने) का रूपमा दोषी ठहर गरिएको छ। आज हुने सुनुवाइमा दुवै पक्षका कानुन व्यवसायीहरूको बहसपछि इजलासले उनीहरूलाई कानुनबमोजिम हुने कैद र जरिवानाको अन्तिम फैसला सुनाउनेछ।