काठमाडौं । रसुवाको भोटेकोशीमा पुनः लेदोसहित पानीको बहाव बढेको सूचना प्राप्त भएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन आग्रह गरेको छ ।

बाढीको गम्भीर जोखिमलाई मध्यनजर गर्दै नुवाकोटको सदरमुकाम विदुर र त्रिशूली बजार क्षेत्रमा उद्धारमा खटिएका डोजर, उपकरण तथा उद्धारकर्मीलाई क्षतिग्रस्त क्षेत्रबाट तत्काल सुरक्षित स्थानमा सारिएको छ

रसुवामा खटिएका प्रहरी वरिष्ठ उपरीक्षक (एसएसपी) दीप शमशेर राणाका अनुसार सम्भावित जोखिमलाई ध्यानमा राख्दै सुरक्षाकर्मीले सीमा क्षेत्र तथा नदी किनारका सडकमा आवागमन पूर्ण रूपमा रोकेका छन् ।

भोटेकोशीमा पानीको सतह निरन्तर बढिरहेको जनाइएको छ । नदीको बहावमा थप वृद्धि हुन सक्ने सम्भावनालाई ध्यानमा राख्दै तल्लो तटीय क्षेत्रमा कार्यरत उद्धारकर्मी तथा सर्वसाधारणलाई सुरक्षित स्थानमा जान चेतावनी दिइएको छ ।

प्राधिकरणले नदीको बहावमा आउने कुनै पनि परिवर्तनलाई गम्भीरतापूर्वक लिन र जोखिमयुक्त क्षेत्रमा अनावश्यक रूपमा नबस्न आग्रह गरेको छ ।