तिलोत्तमा, रुपन्देहीमा देउसी भैलो कार्यक्रमका क्रममा सार्वजनिक स्थानमा अश्लील नृत्य प्रदर्शन गरेको आरोपमा रुपन्देही प्रहरीले दुई जनालाई नियन्त्रणमा लिएको छ ।

जिल्ला प्रहरी कार्यालय रुपन्देहीका अनुसार नेपाली मौलिक कला, संस्कृति, सामाजिक शिष्टाचार तथा नैतिकताको प्रतिकूल हुने गरी देउसी भैलो कार्यक्रममा अश्लील नृत्य प्रदर्शन गरेको पाइएपछि उनीहरूलाई नियन्त्रणमा लिइएको हो ।

प्रहरीले बिहीबार राति करिब १२ः०५ बजे इलाका प्रहरी कार्यालय लुम्बिनीबाट खटिएको टोलीले लुम्बिनी सांस्कृतिक नगरपालिका १० स्थित महिलवार बजारबाट उनीहरूलाई नियन्त्रणमा लिएको जनाएको छ ।

नियन्त्रणमा लिइएकामा रुपन्देहीको देवदह नगरपालिका ७ निवासी ३० वर्षीय चाहना थापा र सर्लाहीको हरिवन नगरपालिका ३ निवासी २१ वर्षीय प्राप्ती बस्नेत रहेका छन् ।

जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक कृष्णकुमार चन्दका अनुसार उनीहरूमाथि सार्वजनिक हित र नैतिकताविरुद्धको कसुरमा थप अनुसन्धान भइरहेको छ ।

प्रहरीले परम्परागत देउसी भैलो कार्यक्रममार्फत नेपाली मौलिक कला, संस्कृति र सामाजिक सद्भावको संरक्षण गर्न आग्रह गरेको छ । साथै, स्वेच्छाचारी तथा अमर्यादित तवरले अश्लील नृत्य, गीत तथा संगीत प्रदर्शन गरेमा प्रचलित कानुनअनुसार कारबाही हुने जनाएको छ ।