बुटवल । नेकपा महासचिव नेत्रविक्रम चन्द विप्लवको घर रहेको कपिलवस्तु शिवगढीमा प्रहरीले सर्च अपरेसन गरेको छ ।

शिवराज नगरपालिका वडा नं. ९ शिवगढीस्थित विप्लवका भतिज यादव चन्दको घरमा प्रहरीको विशेष टोलीले बिहीबार बिहान सर्च अपरेशन गरेपछि केहीबेर तनाव सिर्जना भएको हो ।

प्रहरीले सर्च अपरेशन गर्दै गर्दा स्थानीयबासी प्रतिकारमा उत्रिंदा प्रहरी जवान अमर वली र पुतली चौधरी सामान्य घाइते भएका छन् । सर्च अपरेशनका क्रममा चन्दको घरबाट एसएमजी राइफल एक थान र त्यसमा लाग्ने म्यागेजिन ३ वटा, ,चाइनिज पेस्तोल एक थान र म्यागेजिन २ वटा, ४० मिटर तार र एक थान रिमोट बरामद भएको वडा प्रहरी कार्यालय चन्द्रौटाका प्रहरी निरिक्षक महेश्वर उपाध्यायले बताए ।

सर्च अपरेसन गर्दैगर्दा स्कूले विद्यार्थी समेतको उपस्थिति भएकाले आफूहरुले संयमता अपनाएको प्रहरीले जनाएको छ । विशेष सुराकीको आधारमा प्रहरीले चन्दको घरमा अपरेशन गरेको हो । यहाँ विप्लवका परिवारको बसोबास रहँदै आएको छ ।