काठमाडौ

नेपालको प्रयोगशालाले गर्ने कोरोना भाइरस (कोभिड–१९) को परीक्षण विश्वसनीय भएको विश्व स्वास्थ्य संगठन (डब्ल्युएचओ) ले बताएको छ ।

माइक्रो बायोलोजिस्ट डाक्टर जोनाथन एस्क्क्रोप्टको प्रतिवेदनका आधारमा विश्व स्वास्थ्य संगठनले नेपालले गरेको परीक्षण विश्वसनीय भएको बताएको हो ।

डा. एस्क्क्रोप्टले ३० फागुनदेखि चैतसम्म केन्द्रीय जनस्वास्थ्य प्रयोगशालाले गर्ने परीक्षणको अध्ययन गरेका थिए । स्वास्थ्य तथा जनसंख्या मन्त्रालयको आग्रहमा विश्व स्वास्थ्य संगठनले उनलाई परीक्षणको अध्ययनको जिम्मा दिएको थियो ।

केन्द्रीय जनस्वास्थ्य प्रयोगशालाले गर्ने कोरोना भाइरसको परीक्षण विश्वसनीय र चित्तबुझ्दो रहेको बताउने क्रममा उनले चारवटा सबल बुँदाको चर्चा गरेको संगठनले स्वास्थ्य तथा जनसंख्या मन्त्रालयलाई पठाएको पत्रमा उल्लेख छ । संगठनले मन्त्रालयका सचिवका नाममा पत्र पठाएको हो ।

तिनमा ‘कोरोना भाइरसको परीक्षणमा सबै प्रक्रिया पूरा गरिएको, ल्याब उपकरण पनि राम्रो रहेका र परीक्षणमा खटिएका जनशक्तिको काम पनि राम्रो रहेको र प्रयोगशालाले प्रतिवेदनहरू तथ्यगत हिसाबले विश्लेषण गरेको’ भन्ने छन् ।

कोरोना भाइरस परीक्षणका प्रयोगशालाले उपयुक्त तयारी गरेको बताउँदै प्रशंसा गरेको विश्व स्वास्थ्य संगठनले त्यसका लागि नियमित सहयोगको वचन पनि दिएको छ ।

संगठनले एस्क्क्रोप्टको सुझाबका आधारमा प्रयोगशालाको परीक्षण क्षमता विस्तार गर्नुपर्ने सुझाब पनि दिएको छ ।