काठमाडौं । नेपालस्थित अमेरिकी दूतावासले नेपालमा रहेका आफ्ना नागरिक अमेरिका लैजान अनुमति मागेको छ । दूतावासले अमेरिका फर्कन चाहने आफ्ना नागरिकहरुलाई लैजान दिन अनुमतीका लागि नेपाल सरकारलाई औपचारिक रूपमा आग्रह गरेको हो ।

आफ्नो ट्वीटरमा दूतावासले नेपाल सरकारको अनुमति पाएलगत्तै उडानको व्यवस्था गर्ने जनाएको छ । सरकारले कोरोना भाइरसको संक्रमण जोखिम बढेसँगै एक साताका लागि लकडाउनको घोषणा गरेको छ । जसका कारण सडक एवं हवाई यातायात पनि पूर्ण बन्द छन् ।

लकडाउनको घोषणासँगै कुनै पनि अन्तर्राष्ट्रिय विमानले नेपालमा उडान भरेका छैनन् । कुनै पनि मुलुकले नेपालमा रहेका आफ्ना नागरिक लैजान चाहेमा नेपाल सरकारको स्वीकृति लिनुपर्ने हुन्छ । त्यसैकारण नेपालस्थित अमेरिकी दूतावासले पनि नेपालमा रहेका आफ्ना नागरिक लैजान नेपाल सरकारसँग अनुमति मागेको हो ।