पाल्पा ।
प्रदेश ५ का विभिन्न पहाडी जिल्लाहरुमा जंगली च्याउ खाएर बिरामी पर्नेहरुको संख्यामा बृद्धि हुन थालेको छ । अर्घाखाँची जिल्लाको भूमिकास्थान नगरपालिका वडा नं. ६ खिल्जीमा जंगली च्याउ खाँदा आमाछोरी मृत्यु भएको छ । त्यसको दुई दिनपछि पाल्पामा जंगली च्याउ खाएर एकै घरका ७ जना बिरामी परेका छन् ।

जंगली च्याउ खाँदा पाल्पा तिनाउका अमरदीप बीसीसहित ७ जना बिरामी भएका हुन् । तिनाउ गाउँपालिका ३ दोभान फूलबारीका बीसी, उनकी श्रमती र आमासहित ७ जना बिरामी भएका छन् ।
उनकी श्रीमती ३१ वर्षीया माया बीसी, ६० वषीया आमा कृष्णा सुनार, ३४ वर्षीय निलमाया सुनार, २० वर्षी दिलिप सुनार, १२ वर्षीय रेखा सुनार र १२ वर्षकै थमन सुनार बिरामी भएका छन् ।

उनीहरुको अहिले बुटवलस्थित लुम्बिनी प्रादेशिक अस्पतालमा उपचार भइरहेको छ । आज बिहानबाट उनीहरुको स्वास्थ्यमा सुधार आएको अस्पतालले जनाएको छ । यसअघि रुपन्देहीमा पनि च्याउ खाँदा ७ जना बिरामी भएका थिए ।