काठमाडौं- बाढी–पहिरो पीडितको उद्दारका लागि खट्न भन्दै नेपाल कम्युनिष्ट पार्टी नेकपाको स्थायी कमिटी बैठक साउन १३ गतेसम्मको लागि स्थगित भएको छ ।

सरकारलाई पनि राहत र उद्दारमा कुनै कसर बाँकी नराख्न आग्रह गर्दै साउन १३ गतेसम्मका लागि बैठक स्थगित गरिएको स्थायी समिति सदस्य पेशल खतिवडाले जानकारी दिए ।

मंगलबार बिहान ११ बजेको लागि तय भएको बैठक २ घण्टा स्थगित गरी सुरू भए पनि केहीबेरमै स्थगित भयो ।

नेकपाका दुई अध्यक्ष केपी शर्मा ओली तथा पुष्पकमल दाहाल प्रचण्डबीचको फोन संवादपछि बैठक सारिएको बताइएको थियो । बैठक सुरू भएता पनि प्रधानमन्त्री केपी शर्मा ओली बैठकमा उपस्थित भने थिएनन् ।

सहमति खोज्न स्थायी समिति बैठक पटक–पटक स्थगित गर्दै अध्यक्षद्वय ओली र पुष्पकमल दाहालबीच छलफल भए पनि कुनै सहमतिमा पुगेको थिएन ।