काठमाडौं –नेपालमा कोरोना भाइरस (कोभिड–१९) संक्रमितको संख्या २५ हजार नाघेको छ ।

आज थप ५९४ जना नयाँ संक्रमित थपिएसँगै कोरोनाबाट संक्रमण हुनेको संख्या २५ हजार ५५१ पुगेको स्वास्थ्य तथा जनसंख्या मन्त्रालयले शुक्रबारको नियमित प्रेस ब्रिफिङका क्रममा जानकारी दिएको छ ।

विभिन्न ३९ प्रयोगशालामा गरिएको ११ हजार ५७५ परीक्षणमा थप ५९४ जनामा कोरोना संक्रमण पुष्टि भएको मन्त्रालयका प्रवक्ता प्रा.डा. जागेश्वर गौतमले जानकारी दिए ।

यता, नेपालमा कोरोनामुक्त हुनेको संख्या १७ हजार ७७ पुगेको छ । कुल संक्रमितमध्ये ६६.८ प्रतिशतले कोरोना जितेका हुन् । पछिल्लो २४ घण्टामा थप २४० जना कोरोनालाई जितेर घर फर्किएका छन् ।

शुक्रबार थप चार जनाकाे ज्यान गएसँगै काेराेनाबाट मृत्यु हुनेकाे संख्या ९९ पुगेकाे छ ।

कोरोनाबाट प्रदेश एकमा ९ पुरुषको मृत्यु भएको छ भने प्रदेश २ मा ३१ पुरुष र ११ महिला गरी ४२ जनाको ज्यान गएको छ ।

यस्तै वागमतीमा १३ पुरुष र ५ महिला गरी १८ जनाको ज्यान गएको छ भने गण्डकीमा ६ पुरुषको मृत्यु भएको छ । प्रदेश ५ मा ३ पुरुष र ९ महिला गरी १२ जनाको ज्यान गएको छ भने कर्णालीमा ४ पुरुषको मृत्यु भएको छ । सुदूरपश्चिममा ५ पुरुष र ३ महिला गरी ८ जनाको मृत्यु भएको छ ।

यसरी मृत्यु हुने ९९ मध्ये पुरुषको संख्या ७७ छ भने महिलाको संख्या २२ छ ।