बुटवल ।
रुपन्देहीको गैडहवा गाउपालिकामा छिमेकीको बिहेभोज खान गएका एक २६ बर्षिय युवा मृत अवस्थामा फेला परेका छन ।

मंगलबार बेलुका छिमेकीको घरमा बिहेभोज खान गएका गैडहवा गाउपालिका वार्ड नं। ६ गुलहरियाका २६ बर्षिय दिनेश लोध बुधवार बिहान मृत अवस्थामा फेला परेका हुन् ।

रामापूर–लुम्बिनी सडक खण्ड अन्तर्गत गुलहरियाचोक देखि करिब ५ सय मिटर दक्षिण सडकको किनारमा रहेको परालको टौवामा बेवारिसे अवस्थामा लोधको शव फेला परेपछि स्थानीयहरुले बुधबार बिहान प्रहरीलाई खबर गरेका थिए ।

मृतक लोधको शरिरको अन्य भागमा कुनै चोट पटक नलागेको तर टाउकोको दाहिने कानको माथिल्लो भागमा थिलथिलो भएको प्रहरीले जनाएको छ ।

घाँटी बटारिएको अवस्था शव फेला परेकाले लोधलाई कसैले टाउकोमा प्रहार गरेर घांटी बटारेर मारेको हुन सक्ने उनका काका राम नयन लोधले बताए ।

नेपाल प्रहरी अनुसन्धान ब्युरो नेपालगञ्जको कुकुर शाखाको टोली आएर अनुसन्धान सुरु गरिएको इलाका प्रहरी कार्यलय,सूर्यपुराका प्रहरी निरीक्षक हरिहर खडकाले जानकारी दिए ।