देउखुरी

नेपाली कांग्रेस लुम्बिनी प्रदेश संसदीय दलको नेतामा डिल्ली बहादुर चौधरी चयन भएका छन् ।
दाङ क्षेत्र नम्बर ३ (१) बाट दोस्रोपटक प्रदेश सभामा निर्वाचित चौधरी बहालवाला पर्यटन, ग्रामिण तथा सहरी विकास मन्त्री हुन् ।

संस्थापन पक्षबाट डिल्ली चौधरी, राजु खनाल, अब्दुल रज्जाक र जन्मजय तिमिल्सिनाले संसदीय दलको नेतामा दाबी गरेको भएपनि अन्तिममा चौधरीको पक्षमा सर्वसम्मत सहमति जुटेको नेपाली कांग्रेस लुम्बिनी प्रदेशका प्रवक्ता समेत रहेका प्रदेशसभा सदस्य प्रचण्डविक्रम न्याैपानेले जानकारी दिए ।
लुम्बिनी प्रदेशमा संस्थापन इतरबाट वीरबहादुर राना र निमा गिरी आकांक्षी भएपनि उनीहरुले उम्मेदवारी नदिएपछि चौधरीलाई सहज भएको थियो ।

लुम्बिनी प्रदेश सभामा कूल ८७ सिटमध्ये प्रत्यक्षमा १७ र समानुपातिकमा १० गरी कांग्रेसका २७ जना प्रदेश सभा सदस्य रहेका छन् । प्रदेश सभामा कांग्रेसको संस्थापन पक्षकाे बहुमत रहेकोले पनि चाैधरी निर्वराेध निर्वाचित हुन सहज भएको हो ।