भैरहवा,

रुपन्देहीको सिद्धार्थनगर नगरपलिकाले चौथो राष्ट्रपति रनिङ्ग शिल्ड प्रतियोगिता गराउने भएको छ ।

नगरपालिका भित्रका सामुदायिक तथा सस्थागत बिद्यालयमा अध्ययनरत बिद्यार्थीहरुको शैक्षिक तथा शारिरिक बिकासलाई लक्षित गरेर राष्ट्रपति रनिङ्ग शिल्ड प्रतियोगिता गर्न लागिएको सिद्धार्थनगर नगरपालिका प्रमुख ईस्तियाक अहमद खाँले जानकारी दिनुभयो । उहाँका अनुसार यही पुस २७, २८ र २९ गते सिद्धार्थनगर नगरपालिका बडा नं १ मा रहेको पक्लिहवा माध्यमिक बिद्यालयमा प्रतियोगिता हुने छ । आवश्यक परे पक्लिहवा कृषि क्याम्पसको खेलमैदानलाई समेत प्रयोग गर्न सकिने गरी निर्णय भएको नगरपालिकाले जनाएको छ । प्रतियोगिताको तयारी तिव्र पारिएको छ ।

विद्यालयस्तरमा रहेका प्रतिभालाई छनौट गरी उत्कृष्ट खेलाडीहरुलाई जिल्ला स्तरीय हुँदै प्रदेश र राष्ट्रिय प्रतियोगितामा समावेश गराउने उद्देश्यले रनिङ शिल्ड आयोजना गरिएको नगरपालिकाका शिक्षा युवा तथा खेलकुद बिकास शाखा प्रमुख चेतनशिल लम्सालले जानकारी दिनुभयो । प्रतियोगितामा तेक्वान्दो, एथलेटिकस, कबड्डि, भलिवल जस्ता खेल हुने छन् । प्रतियोगिता सचांलनकालागि खेल संयोजकहरु पनि तोकिएको छ । तेक्वान्दो तर्फ दिपेन्द्र बुढाप्रिति, एथलेटिक्स तर्फ कृष्ण शाक्य, कबड्डि तर्फ महेन्द्र बहादुर सुनार र भलिवल तर्फ दिनेश आचार्यलाई सयोजक तोकिएको छ ।

प्रतियोगितामा सिद्धार्थनगर नगरपालिका अन्तरगत रहेका सामुदायिक, संस्थागत बिद्यालयहरुको सहभागिता रहने छ ।