काठमाण्डाै – प्रधानमन्त्री सुशीला कार्कीले चुनावी सुरक्षाको जिम्मेवारी पूरा गर्न नेपाली सेनालाई निर्देशन दिनुभएको छ । आउँदो फागुन २१ गते हुने प्रतिनिधिसभा सदस्यको चुनावका लागि शान्ति सुरक्षा कायम गरी सफलतापूर्वक सम्पन्न गर्ने काममा सेनाको महत्त्वपूर्ण भूमिका रहेको उहाँले बताउनुभएको छ ।

काठमाण्डाैकाे भद्रकालीमा रहेकाे नेपाली सेनाको मुख्यालय पुगेर निरीक्षणका क्रममा प्रधानमन्त्री कार्कीले वर्तमान सरकारलाई प्राप्त जिम्मेवारी अनुसार शान्ति सुरक्षाको प्रत्याभूतिसहित स्वतन्त्र, निष्पक्ष र भयरहित वातावरणमा चुनाव सम्पन्न गरी राष्ट्रिय अभिभारा पूरा गर्ने अभियानमा सेनाको प्रमुख भूमिका रहेको बताउनुभयो ।

सबै राजनीतिक दलका राजनीतिक गतिविधिलाई विना अवरोध सञ्चालन गर्ने वातावरण सिर्जना गर्न स्पष्ट कार्ययोजनासहित अघि बढ्न उहाँले सेनालाई निर्देशनसमेत दिनुभएको छ ।

नागरिकको ज्यान जाने र घाइते हुने अवस्था आउन नहुनेमा जोड दिँदै प्रधानमन्त्रीले यसअघिका चुनावको समेत अनुभव र आउँदो चुनावको अवस्था विश्लेषण गरी सुरक्षा संवेदनशीलताका आधारमा सबै सुरक्षा निकायसँग समन्वय गरी त्रुटिरहित ढङ्गले काम गर्न निर्देशन दिनुभयो ।

नवयुवकाे आन्दाेलनका क्रममा लुटिएका र हराएका हातहतियारको खोजतलाससहित नियन्त्रणमा लिन प्रहरीलगायत सुरक्षा निकायसँग आवश्यक सहकार्य गर्न पनि उहाँको निर्देशन रहेको प्रधानमन्त्रीको सचिवालयले जनाएको छ ।

हिजो मात्रै राष्ट्रपति रामचन्द्र पौडेलले चुनावको सुरक्षाका लागि सेना परिचालनको स्वीकृति दिनुभएको थियो ।