बुटवल

विद्युत प्राधिकरणले ट्रंक लाइन विलिङ्ग छुट भनी उद्योगीहरुलाई बक्यौता बुझाउन पुनः पत्राचार गरेसँगै बुटवल—भैरहवा क्षेत्रका उद्योगीहरु चिन्तित बनेका छन् ।
प्राधिकरणले विगतमा लोडसेडिङ्ग व्यवस्थित गर्ने शिलशिलामा उद्योगीहरुको माग र सहमति बिनै एकलौटी ढंगबाट ट्रंक लाइन जडान गरिदिएको र हालसम्म उद्योगीहरुले साधारण विलिङ्ग बमोजिम महशुल भुक्तानी गर्दै आइरहेका थिए । विद्युत प्राधिकरणले २०७२ सालदेखिको बक्यौता बुझाउन पत्राचार गरेपछि उद्योगीहरुमाथि अन्याय भएको उद्योगीहरुले बताएका छन् ।
रुपन्देही उद्योग संघमा आयोजित एक छलफलमा सहभागि उद्योगीहरुले आफुहरु माथि अन्याय हुन लागेको भन्दै समस्या समाधानका लागि पहल गर्न रुपन्देही उद्योग संघसँग आग्रह गरेका छन् ।
संघका अध्यक्ष बाबुराम बोहोराको अध्यक्षतामा सम्पन्न छलफलले प्राधिकरणले एकलौटी ढंगबाट लाखौं रुपैयाँ बक्यौता रहेको भनेर उद्योगी ब्यवसायीलाई पत्राचार गरिनु उद्योगी माथिको प्रहार भएको निचोड निकालेको छ ।
सरकारले लोडसेडिङ्ग पूर्ण रुपमा मुक्त भएको घोषणा गरिसक्दा समेत प्राधिकरणले हालसम्म पनि सोही अनुरुप ट्रंकलाइन महशुल असुल उपर नगर्न र मनोमानी ढंगबाट एकाधिकारको गलत प्रयोग नगर्न समेत रुपन्देही उद्योग संघले आग्रह गरेको छ ।
यो समस्या समाधानका लागि पटकपटक आग्रह गर्दा समेत प्राधिकरणले चासो नदिनुले उद्योग प्रति प्राधिकरणको भूमिका सकारात्मक हुन नसेको भन्दै संघले गम्भिर ध्यानाकर्षण भएको जनाएको छ ।