काठमाडौं-नेपालमा कोरोना भाइरस (कोभिड–१९) संक्रमितको संख्या २२ हजार नाघेकाे छ ।

शुक्रबार थप ४६४ जनामा संक्रमण पुष्टि भएसँगै संक्रमितको संख्या २२ हजार २१४ पुगेको स्वास्थ्य तथा जनसंख्या मन्त्रालयले जानकारी दिएको छ ।

विभिन्न प्रयोगशालामा ७ हजार ९२६ जनामा गरिएको परीक्षणमा थप ४६४ जनामा संक्रमण पुष्टि भएको मन्त्रालयका प्रवक्ता प्रा.डा. जागेश्वर गौतमले जानकारी दिए ।

कुल संक्रमितमध्ये सक्रिय संक्रमितको संख्या ६ हजार ३३० रहेको छ । प्रादेशिक रूपमा संक्रिय संक्रमितकाे संख्या प्रदेश नं १ मा ४२५, प्रदेश २ मा २ हजार ८३९, वागमतीमा ९४३, गण्डकीमा २७६, प्रदेश नं ५ मा ३७६, कर्णालीमा २३१ र सुदूरपश्चितमा १ हजार २४० रहेकाे छ ।

यता, नेपालमा कोरोनामुक्त हुनेको संख्या १५ हजार ८१४ पुगेको छ । पछिल्लो २४ घण्टामा थप ४२५ जना कोरोनालाई जितेर घर फर्किएका छन् ।

पछिल्लो २४ घण्टायता थप पाँच जनाका कोरोनाबाट ज्यान गएकाे छ । यससँगै काेराेनाबाट मृत्यु हुनेकाे संख्या ७० पुगेकाे छ ।