काठमाडौं – प्रमुख प्रतिपक्षी दल नेपाली कांग्रेसको केन्द्रिय समिति बैठक आज बस्दैछ । बैठक पार्टी केन्द्रिय कार्यालय सानेपामा दिउँसो १ बजेका लागि बोलाइएको हो ।

पार्टी संसदीय दलकी सचेतक पुष्पा भूषालका अनुसार बैठकमा पार्टीको आगामी १४ औं महाधिवेशन र पार्टीको आन्तरिक विवादका विषयमा छलफल हुनेछ । यसैगरी सरकारका गतिविधि र सरकारविरुद्ध विरोध प्रदर्शन लगायतमा छलफल हुने बताइएको छ ।

यसअघि शीर्ष तहका नेताबीच भएको बैठकले पार्टी विवादमा समाधान निकाल्न नसकेपछि बैठक चार पटक मिति तोक्दै सर्दै आएको थियो । पार्टीमा मनोमानी बढेको भन्दै वरिष्ठ नेता पौडेलसहितका २७ जना केन्द्रिय सदस्यले देउवाविरुद्ध लिखित रुपमै विरोध जनाएका छन् ।

विरोधपत्रबारे सभापतिले उचित सम्बोधन नगरेको भन्दै आजको बैठकमा यहि विषय बुलन्द रुपमा उठाउने पौडेल पक्षका नेताहरुले तयारी छ । यसअघि पदाधिकारी, पूर्वपदाधिकारी र केन्द्रीय सदस्यहरुसहित सातपटक सम्म बसेको बैठकले पौडेल समूहले उठाएको अधिकाश विषयहरु सम्बोधन गर्ने सैद्धान्तिक सहमति गरेको थियो ।