काठमाडौं – प्रधानमन्त्री केपी शर्मा ओलीले मन्त्रिपरिषद् बैठक बोलाएका छन् । पार्टीको सचिवालय बैठक रोक्न जोडबल गर्दै आएका नेकपा अध्यक्षसमेत रहेका प्रधानमन्त्री ओलीले दिउँसो १ बजेका लागि मन्त्रिपरिषद्को बैठक बोलाएका हुन् ।

मन्त्रिपरिषद्को बैठक सामान्यतया सोमबार र बिहीबार बस्ने गरेको छ तर, आज कुनै विशेष एजेन्डाबिनै प्रधानमन्त्रीले मन्त्रिपरिषद्को बैठक डाकेका हुन् । उसो त आजै १ बजे नेकपा सचिवालय बैठक बस्ने भनिएको छ । प्रधानमन्त्री ओलीले त्यही समय मिल्ने गरी मन्त्रिपरिषद बैठक राख्न लागेका हुन् ।

मन्त्रिपरिषद्को आकस्मिक बैठक गर्ने निर्णय राष्ट्रपति विद्यादेवी भण्डारीसँग मगंलबारको मध्यरातमा भएको बैठकपछि लिएकोले दल विभाजन सम्बन्धी अध्यादेशसँगै मन्त्रिपरिषद्को पुर्नगठनबारे निर्णय हुन सक्ने बुझिएको छ । तर यसको पुष्टि भने हुन सकेको छैन ।

कार्यकारी अध्यक्ष प्रचण्डले सचिवालय बैठकमा प्रधानमन्त्रीसमेत रहेका अध्यक्ष ओलीको आलोचना गर्दै १९ पेजको प्रस्ताव पेश गरेका थिए । त्यसयता नेकपाभित्र अध्यक्षद्वय ओली र प्रचण्डबीच सम्बन्ध चिसिएको छ ।