‘अहिले देशले त्रास र भयको शासनबाट मुक्ति पाएको छ,’ प्रधानमन्त्री समेत रहेका देउवाले भने, ‘म धेरै कुरा बोल्दिनँ, मलाई जिताउनुभयो भने ओलीको जस्तो शासनबाट देशले सधैँ मुक्ति पाउँछ।’

अबको चुनावमा तीनै तहको सरकार काङ्ग्रेसको बन्ने दाबी गरेका उनले त्यसका लागि आफूलाई भोट दिनुपर्ने शर्त राखे । ‘गाउँदेखि माथिसम्मको सरकार बनाउने मेरो जिम्मा भयो,’ उनले भने, ‘यसका लागि म सभापति बन्नुपर्छ . सभापतिमा मलाई भोट दिनुस्, सरकार बनाउँछु, बनाउँछु ।’

स्थानीयदेखि केन्द्रसम्मको सरकार आफूले बनाएरै छाड्ने ६ पटक दोहोर्‍याएका प्रधानमन्त्री देउवाले आफूलाई एकपटक जिताउनैपर्ने बताए । अत्यन्त छोटो बोलेका उनले पार्टीमा भएका समस्यालाई समाधान गरेर अघि बढ्ने दृढता व्यक्त गरे ।