काठमाडौं । नेपाल कम्युनिष्ट पार्टीको पहिलो सचिवालय बैठकले ४४१ सदस्यीय केन्द्रीय समितिलाई पूर्णता दिएको छ ।

सोमबार प्रधानमन्त्रीको सरकारी निवास बालुवाटारमा बसेको पहिलो सचिवालय बैठकले केन्द्रीय समितिलाई पूर्णता दिएको हो ।

त्यसैगरी, बैठकले तल्लो तहको एकीकरणका लागि तीनओटा छुट्टा–छुट्टै कार्यदल गठन गर्ने निर्णय गरेको छ ।

संगठनात्मक एकीकरणको प्रक्रिया अगाडि बढाउन विधानको परिपूरक हुनेगरी नियमावली निर्माण गर्न एक मस्यौदा कार्यदल गठन पनि गरिएको छ ।

कार्यदलमा महासचिव विष्णु पौडेल, नेताहरु देव गुरुङ, खिमलाल देवकोटा र बेदुराम भुषाल छन् ।

बैठकले सातओटै प्रदेश र प्रवासको एकीकरणका लागि सुझाव पेस गर्न पूर्वघटकका इन्चार्ज संयोजक र सहसंयोजक रहने गरी हरेक प्रदेश र प्रवासका लागि चार–चार सदस्यीय कार्यदल गठन गरेको पार्टी प्रवक्ता नारायणकाजी श्रेष्ठले जानकारी दिए ।

कार्यदलको समायवधि १५ दिन तोकिएको छ ।

त्यसैगरी, बैठकले केन्द्रीय कार्यालयको स्थान निर्धारणका लागि प्रधानमन्त्री तथा पार्टी अध्यक्ष केपी शर्मा ओली र अध्यक्ष पुष्पकमल दाहाललाई जिम्मेवारी दिएको छ ।

बैठकले पार्टीको मूल वैचारिक तथा सैद्धान्तिक लाइन छिट्टै निर्धारण गर्ने र राजीतिक प्रतिवेदन तथा विधान प्रकाशन गर्ने निर्णय पनि गरेको छ ।