बुटवल । नेपाली कांग्रेसका नेता प्रकाशमान सिंहले आफ्नो पक्षमा बहु्मत छ भन्दैमा पार्टी सभापति शेरबहादुर देउवाले मनपरी गरेको आरोप लगाएका छन्।

केपी ओली नेतृत्वको सरकार र देउवा नेतृत्वको कांग्रेसको तुलना गर्दै उनले शक्ति भएर पनि राम्रोसँग चलाउन नसकेको भन्दै आलोचना गरे । ‘उहाँहरुसँग बहुमत छ, पावर छ तर कसरी चलाईरहनुभएको छ-उनले भने–बहु्मत छ भन्दैमा मनलाग्दी गरेर पनि त भएन।

बुटवलमा प्रेस युनियन रुपन्देहीले गरेको कार्यक्रममा बोल्दै उनले कांग्रेसको विधानविपरीत उपसभापतिमा विजयकुमार गच्छदारलाई ल्याएको भन्दै त्यसको आलोचना गरे ।

उनले सरकारले अलोकप्रिय निर्णयहरु गरिरहेकोले जनताबाट आलोचित भइरहेको बताए। उनले जनताका गुनासो सम्बोधन गर्न नसकेर सरकारले आलोचना खेप्नुपरेको र प्रतिपक्षी दलको भूमिका निभाउन नसकेर कांग्रेस नेतृत्वको आलोचना भइरहेको बताए।

उनलेदुई तिहाई बहुमतको अहिलेको सरकार सबै क्षेत्रमा असफल बन्दै गएको बताए। उनले जनतालाई शान्ति सुरक्षा दिनेदेखि बिकास गर्ने सबै काममा सरकार असफल भएको बताए।