बुटवल : प्रदेश नं ५ को प्रदेश सभाको बैठक प्रदेश प्रमुख उमाकान्त झाको आह्वानमा यही मङ्सिर २६ गते बस्ने भएको छ ।

मुख्यमन्त्री शङ्कर पोखरेलको सिफारिशमा संविधानको धारा १८३ को उपधारा १ बमोजिम आगामी मङ्सिर २६ गते दिनको १ बजेका लागि प्रदेशसभाको बैठक आह्वान गर्नुभएको प्रदेश प्रमुखको कार्यालयका प्रवक्ता कमलप्रसाद घिमिरेद्वारा जारी विज्ञप्तिमा उल्लेख छ ।

यसअघि सोमबार बसेको मन्त्रिपरिषद् बैठकले प्रदेशसभाको बैठक आह्वान गर्नका लागि प्रदेश प्रमुखलाई अनुरोध गर्ने निर्णय गरेको थियो ।

२६ गते बस्ने बैठकमा प्रदेश सभामा सबै दलका प्रतिनिधिहरुले सम्बोधन गर्नेछन् र पुस पहिलो हप्तासम्मका लागि स्थगित गर्ने तयारी छ ।

नेपाली कांग्रेसको महासमिति बैठकका कारण प्रदेश सभाको बैठक बीचमा स्थगित हुनेछ ।