बुटवल- अनियमितताको आशंका गरिएको भन्दै नेपाली कांग्रेस प्रदेश ५ संसदीय दलका नेता बलदेव शर्मा पोखरेलले आफू चढ्दै आएको गाडी फिर्ता गरेका छन्।

उनले चढ्दै आएको लु १ झ ४४७ नम्बरको टाटा स्टोर्म गाडीकाे चाबी र ब्लुबुक प्रदेश सभा सचिवालयका सचिव दुर्लभ कुमार पुन मगरलाई बुझाएका हुन्।

‘यो गाडी खरिदमा अनियमितता र अपारदर्शिता भयो भन्ने प्रश्न उठिसकेपछि मेरो नैतिकताले यो गाडी चढ्न दिएन’, उनले गाडीको चाबी बुझाएपछि पत्रकारहरुसँग भने।

गाडी खरिदमा अनियमितता भएको आशंका गर्दै सार्वजनिक लेखा समितिले उपसमिति बनाएर छानबिन गरिरहेको छ।

कांग्रेस संसदीय दलका नेताले गाडीको चाबी र ब्लुबुक बुझाएपछि सचिवालयका सचिव पुन मगरले गाडी सुरक्षित साथ राख्ने प्रतिक्रिया दिए। यसअघि सार्वजनिक लेखा समितिका सभापति डिल्ली चौधरीले पनि गाडी फिर्ता गरेका थिए।