कपिलवस्तु
कपिलवस्तुको बाणगंगा नगरपालिका फाइलेरिया अर्थात् हात्ती पाइले रोग निवारण अभियानमा जुटेको छ । सन् २०२० भित्र नेपालबाट हात्तीपाइले रोगलाई निवारण गर्ने उदेश्यले नेपाल सरकारले संचालन गरेको अभियान अन्तर्गत बाणगंगा नगरपालिकामा पनि सुरु भएको हो ।
बर्षको एक मात्रा औषधी लगातार ६ बर्षसम्म सेवन गरौँ, हात्तीपाइले हुनबाट बचौँ र बचाऔँ भन्ने नारासहित देशभर सुरु भएको अभियान अन्तर्गत बाणगंगा नगरपालिकामा पनि नगर स्तरीय योजना तर्जुमा तथा अन्तरक्रिया गोष्ठी सम्पन्न भएको छ ।
नगरका सामाजिक विकास समिति संयोजक भिष्मराज भुसालको अध्यक्षता, प्रदेश सांसद विष्णु पन्थीको प्रमुख आतिथ्य र नगरपालिकाका प्रमुख प्रशासकीय अधिकृत चुरामणी पन्थीको विशिष्ट आतिथ्यमा भएको अन्र्तक्रियामा मेडिकल अधिकृत डाक्टर गंगाराम यादवले हात्तीपाइले रोगबारे प्रशिक्षण दिनुभएको थियो ।
उहाँले यो रोग निवारण गर्न सबैले अनिवार्य रुपमा औषधी सेवन गर्नु पर्ने बताउनु भयो । उहाँले नेपालमै कपिलवस्तु जिल्ला हात्तीपाइलेको उच्च जोखिममा रहेकाले सावधानी अपनाउन जरुरी रहेको बताउनु भयो ।
पोथी लामखुट्टेको टोकाइबाट लाग्ने यो सरुवा रोगलाई निवारण गर्ने एक मात्र उपाय भनेको औषधी सेवन भएकाले स्वास्थ्य कर्मीको निर्देशनमा अनिवार्य रुपमा औषधी सेवन गर्न डाक्टर यादवले आग्रह गर्नुभयो । २ बर्ष मुनी, ७० बर्षमाथिका, अति सिकिस्त र ७ दिनसम्मका गर्भवती महिला बाहेक सबैले औषधी सेवन गर्दा कुनै असर नहुने उहाँले प्रष्ट पार्नुभयो ।
हात्ती पाइले रोगको कारण, सर्ने तरिका, बच्ने उपाय आदिको बारेमा बताउँदै डाक्टर यादवले टोलटोलमा जनचेतना लिएर जान पनि सबैलाई अनुरोध गर्नुभयो । प्रमुख अतिथि सांसद पन्थीले पनि यो रोग विश्वको लागि चुनौती भएको बताउँदै औषधी खानबाट कोही छुट्न नहुने बताउनुभयो । कपिलवस्तु जिल्लामा अझै पनि यसको जोखिम उच्च रहेकाले जनचेतनाको विस्तारमा ध्यान पुर्याउनु पर्ने उहाँको भनाई छ ।
नगरका स्वास्थ्य शाखा प्रमुख ठगराज पौडेलले नगरले यो अभियानलाई मिसनको रुपमा लिँदै कोही पनि यसको औषधीबाट बञ्चित हुने अवस्था आउन नदिने बताउनु भयो। यो अभियानलाई सफल बनाउन नगरमा १ सय ११ स्वास्थ्य स्वयमु् सेविकाहरु खटिएको बताउनु भयो ।
उहाँले माघ महिनाभर अस्पताल, वडा र टोल स्तरमा अभियान संचालन गरिने बताउँदै सबैले यसमा साथ दिन जरुरी रहेको बताउनु भयो । अब एक बर्षसम्म निरन्तर अभियान गरेर सरकारको लक्ष्य अनुसार बाणगंगा नगरपालिकालाई पनि हात्तीपाइले निवारण नगर घोषणा गरिने दृढता जनाउनु भयो । कार्यक्रममा ११ वटै वडाका वडाध्यक्ष, स्वासथ्य स्वयम् सेविकाहरु, कर्मचारी संचारकर्मी लगायतको सहभागिता रहेको थियो ।