बुटवल,
दाङको देउखुरी क्षेत्रमा राजधानी तोक्ने प्रस्ताव प्रदेश सभा पेश गरिसकेपछि नेकपा प्रदेश संसदीय दललले सो प्रस्तावमा सहमति जुटाउने प्रयास गरेको छ ।

प्रदेश ५ सरकारले प्रदेश सभामा पेश गरेको दोस्रो दिन शनिबार प्रस्तावमा सहमति जुटाउन नेकपा प्रदेश संसदीय दलको बैठक बोलाएको हो ।

मुख्यमन्त्री शंकर पोखरेलको निवास डिभिजन सडक कार्यालय परिसरमा बिहान करिब सवा ८ बजेदेखि बैठक बसिरहेको नेकपाका प्रमुख सचेतक भूमिश्वर ढकालले जानकारी दिए ।
बैठकले प्रदेश सरकारले प्रदेश सभामा पेश गरेको प्रस्तावका बिषयमा छलफल गरी निर्णयमा पुग्ने जनाइएको छ ।

नेकपाले संसदीय दलको बैठकमा सबै प्रदेशसभा सदस्यलाई अनिवार्य उपस्थितिका लागि खबर गरेको छ ।

पूर्व लुम्बिनी अञ्चल क्षेत्रका प्रदेशसभा सदस्यहरुले भौतिक पूर्वाधार नै नभएको स्थानमा राजधानी तोक्नु भूगोल र नागरिकको मर्म विपरीत भएको भन्दै पुनर्विचार गर्न आग्रह गरेका छन् ।

दाङको देउखुरी उपत्यकामा प्रदेशको स्थायी राजधानी बनाउन प्रदेश सरकारले प्रदेश सभामा प्रस्ताव पेश गरे लगत्तै कांग्रेस प्रदेश सभा सदस्यहरुले बिरोध जनाएका थिए बुटवल लगायत रुपन्देहीका बिभिन्न ठाउमा बिरोध प्रदर्शनहरु भएका थिए ।

प्रदेश सरकारले शुक्रबार दाडको देउखुरी क्षेत्रमा राजधानी तोक्ने प्रदेश सभामा प्रस्ताव पेस गरेको थियो । नेकपा सदस्यहरु एक भएर मतदान गरे प्रस्ताव पारित हुनेछ ।

प्रदेश ५ मा नेपाल कम्युनिष्ट पार्टी (नेकपा)का ६१, विपक्षी नेपाली कांग्रेसका १९,मधेस केन्द्रित दलका ६,राष्ट्रिय जनमोर्चाका १ सहित ८७ जना सांसद रहेका छन् ।