काठमाडौं -प्रधानमन्त्री केपी शर्मा ओली आज (मङ्गलबार) मोरङ र झापाका विभिन्न स्थानमा आयोजित कार्यक्रममा सहभागी हुने भएका छन् ।

यति एयरलाइन्सको जहाजमार्फत बिहान ११ बजे भद्रपुर विमानस्थल हुँदै झापा आउने उनी प्रमुख अतिथिका रुपमा कार्यक्रमहरुमा रहने छन् । सुरुमा बिर्तामोड नगरपालिका–७ मा विपन्न ३७ परिवारका लागि निर्माण गरिएको आवासको उद्घाटन कार्यक्रममा ओली सहभागी हुने तय भएको छ । प्रधानमन्त्रीले उद्घाटन गरेपछि नगरपालिकाले आवास समुदायलाई हस्तान्तरण गर्ने छ ।

अव्यवस्थित रुपमा बसोवास गर्दै आएका ३७ विपन्न परिवारका लागि बिर्तामोड नगरपालिकाको संयोजनमा आवास निर्माण गरिएको हो । धनजुजु श्रेष्ठ र कमला श्रेष्ठले एक बिघा तीन कट्ठा जग्गा उपलब्ध गराएपछि आवास निर्माण सम्भव भएको नगर प्रमुख धुब्रकुमार शिवकोटीले बताए ।

हेविट्याट नेपालको ८३ लाख रुपैयाँ र सहारा नेपालको प्राविधिक सहयोगमा नगरपालिकाले आवास निर्माण गरेको हो । विशेष गरी चौधरी, कुर्मी र सन्थाल समुदायका विपन्न नागरिकका लागि सात दशमलव तीन धुर क्षेत्रफलमा घरहरु तयार गरिएका हुन् । एउटा आवास निर्माणमा चार लाख रुपैयाँ खर्च भएको निर्माण समितिका सचिव अविरल कृष्ण खरेलले जानकारी दिए । आवास योजनालाई प्रदेश गौरव भिलेजको रुपमा नामाकरण गरिएको छ ।

आवास उद्घाटनपछि उनले बिर्तामोडमै निर्माण भएको पूर्वाञ्चल क्यान्सर हस्पिटलको उद्घाटन गर्ने छन् । उक्त हस्पिटल बी एण्ड सी अस्पतालले सञ्चालनमा ल्याएको हो । अस्पतालका कार्यकारी प्रमुख दुर्गा प्रसाईले क्यान्सरको उपचारमा अब विदेश गइरहन नपर्ने दाबी गरे । उनका अनुसार तीन सय बेडको स्वीकृति पाए पनि हाल एक सय बेड मात्रै सञ्चालनमा ल्याइएको छ ।

झापाका दुईवटा कार्यक्रम सकिएपछि ओली मोरङ प्रवेश गर्ने छन् । उनले उर्लाबारी नगरपालिका–८ र ९ को सीमानामा रहेको रातोहोली खोल्सीनजिक लोपोन्मुख एवं अल्पसंख्यक सन्थाल समुदायका लागि निर्माण गर्न लागिएको एकीकृत सन्थाल बस्तीको शिलान्यास गर्ने कार्यक्रम छ ।

उर्लाबारी–९ मा सन्थाल बस्तीको शिलान्यास गरेपछि प्रधानमन्त्री ओलीले उर्लाबारी–८ मा आयोजित कार्यक्रमलाई सम्बोधन गर्ने छन् । उर्लाबारी–८ का वडा अध्यक्ष कूलबहादुर कार्कीले शिलान्यास र सम्बोधन कार्यक्रमका लागि सबै तयारी पूरा भइसकेको जानकारी दिए । उनका अनुसार सन्थाल जातिका लागि ३० करोड रुपैयाँ खर्च गरेर दुई वर्षभित्रमा एकीकृत बस्ती निर्माण गरिसक्ने योजना छ ।

झापा र मोरङका विभिन्न कार्यक्रममा सहभागी भएपछि उनी आजै काठमाडौं फर्कने छन् । विराटनगर विमानस्थल हुँदै प्रधानमन्त्री ओली काठमाडौं फर्कने तय भएको छ ।

ओली विभिन्न कार्यक्रममा सहभागी हुन गत आइतबार पनि झापा आएका थिए । झापाका तीन स्थानीय तहहरु दमक नगरपालिका, गौरादह नगरपालिका र कमल गाउँपालिका क्षेत्रमा बन्ने नेपाल–चीन मैत्री औद्योगिक पार्कको शिलान्यास ओलीले गरेका थिए ।

त्यही दिन जिल्लाका विभिन्न विकास आयोजनाको शिलान्यास पनि उनले गरे । ओलीको एक सातामा तीन दिन झापा पुग्ने कार्यक्रम यसअघि नै तय भएको थियो । आगामी २१ गते पनि उनी झापा आएर सुखानीको कार्यक्रममा सहभागी हुने बताइएको छ ।

यसैबीच प्रधानमन्त्री ओली आउने भएपछि झापा र मोरङको सुरक्षा व्यवस्था बिहानैदेखि अत्यन्त कडा पारिएको छ । सुरक्षा व्यवस्था मजवुत बनाउन नेपाली सेना, नेपाल र सशस्त्र प्रहरी तथा राष्ट्रिय अनुसन्धानसमेतका चारवटै निकायलाई परिचालन गरिएको छ । ठाउँठाउँमा ठूलो संख्यामा सुरक्षाकर्मी खटाइएको छ ।

मोरङ प्रहरी प्रमुख एसपी सन्तोष खड्का र झापा प्रहरी प्रमुख एसपी सानुराम भट्टराई सुरक्षा व्यवस्था मिलाउन आफै फिल्डमा खटिएका छन् । कुनै पनि कमजोरी हुन दिने हिसाबमा पर्याप्त सुरक्षाकर्मी परिचालन गर्दै भरपर्दो सुरक्षा व्यवस्था मिलाइएको प्रदेश १ प्रहरी प्रमुख डीआईजी ईश्वरबाबु कार्कीले जानकारी दिए । उनका अनुसार भद्रपुर विमानस्थलदेखि विभिन्न कार्यक्रमहरु आयोजना गरिएका स्थान र प्रधानमन्त्री काठमाडौं फर्कने विराटनगर विमानस्थलसम्मको सुरक्षा व्यवस्था अत्यन्तै कडा पारिएको हो ।

नेपाल प्रहरीका डीआईजी कार्की र प्रदेश १ सशस्त्र प्रहरी बल प्रमुख डीआईजी वंशीराज दाहाल झापा पुगिसकेका छन् । प्रधानमन्त्रीको भ्रमणका सन्दर्भमा मिलाइएको सुरक्षा व्यवस्थाको अनुगमन र निरीक्षणका क्रममा रहेका उनीहरुले सुरक्षामा कुनै पनि कमजोरी हुन नदिन निर्देशन दिएका छन् ।