काठमाडौं : प्रतिनिधिसभाको बैठक आज बस्दैछ।

दिउँसो १ बजे बस्ने बैठकमा अख्तियार दुरुपयोग अनुसन्धान आयोग तेस्रो संशोधन विधेयक,२०७७ र भ्रष्टाचार निवारण पहिलो संशोधन विधेयक २०७७ का सम्बन्धमा राष्ट्रियसभाबाट प्राप्त सन्देशसहितको विधेयक टेबुल गर्ने सम्भावित कार्यसूची रहेको छ।

त्यस्तै राष्ट्रियसभाबाट सन्देशसहित प्राप्त ‘सुरक्षण मुद्रणसम्बन्धी विधेयक, २०७७ माथि विचार गरियोस’ भनी प्रस्ताव प्रस्तुत हुने संसद सचिवालयले जनाएको छ। यो विधेयकमाथि गत चैत २९ गते सैद्धान्तिक छलफल भएर विचार गरियोस् भन्ने प्रस्ताव पेश गर्न लाग्दा गणपुरक संख्या नपुगेपछि संसद बैठक नै स्थगित गर्नुपरेको थियो।

आजको संसद बैठकमा कांग्रेसका नेता तथा पूर्व सांसद तेजमान तुम्बाहाम्फेको निधनमा शोक प्रस्ताव पारित गरिने कार्यसूची पनि छ।

वि.सं. २०१५ सालको आमनिर्वाचनमा धनकुटाको साविक क्षेत्र नम्बर २६ बाट निर्वाचित सांसद तुम्बाहाम्फेको ९७ वर्षको उमेरमा गत चैत २४ गते निधन भएको थियो।