बुटवल,१ साउन ।
प्रधानमन्त्री पुष्पकमल दाहाल (प्रचण्ड) को तस्वीरसहित गलत कुरा लेखेर सामाजिक सञ्जालमार्फत दुष्प्रचार गरेको आरोपमा एकजना युवा पक्राउ परेका छन् ।

पक्राउ पर्नेमा रूपन्देहीको देवदह नगरपालिका-८ का टाइगर रानामगर भनिने शेरबहादुर राना मगर रहेका छन् ।

प्रधानमन्त्री पत्नी सीता दाहालको निधनसँग जोडेर प्रधानमन्त्रीको तस्वीरसहित असंवेदनशील कुरा लेखेको आरोपमा उनलाई प्रहरीले बुटवलबाट पक्राउ गरेको हो ।

उनलाई केन्द्रीय साइबर ब्युरोले आइतबार बुटवल देवीनगरबाट पक्राउ गरेको ईलाका प्रहरी कार्यालय बुटवलका प्रहरी नायव उपरिक्षक दान बहादुर थापाले बताए ।

रानालाई काठमाण्डौमा साईबर क्राईम सम्बन्धि मुद्दा चलाइने थापाले बताए । रानाले प्रधानमन्त्रीको फोटोसँगै जोडेर भारतीय आधार कार्ड, आयकर कार्डलगायत नक्कली विवरणसहितको तस्वीर बनाएर सामाजिक सञ्जालमा राखेका थिए ।