बुटवल,

राष्ट्रिय स्वतन्त्र पार्टीका सभापति रबी लामिछानेले जनतालाई धुलो खुवाउदै गाडीमा झन्डा हल्लाउँदै हिड्नेहरूलाई धुलो चटाउने चेतावनी दिएका छन् ।

पुर्व पश्चिम राजमार्ग अन्तर्गत नारायणघाट-बुटवल सडक खण्ड पैदल यात्राको बुधबार बेलुका बुटवलमा समापन गर्दै सभापति लामिछानेले जनतालाई धुलो खुवाएर आफू झन्डा हल्लाउँदै हिड्ने नेताहरूलाई धुलो चटाइदिने चेतावनी दिएका हुन् ।

लामो समयसम्म सडक निर्माणकाे काम नसकेर आम उपभोक्तालाई बर्षाैसम्म धुलो खुवाउनु सिंगो युग र पुस्तामाथिको अपराध भएको भन्दै उनलेे राष्ट्रिय गाैरवकाे आयोजनाकाे काममा एउटा ठूलो घर बनाउने कार्यमा जति मजदुर पनि नखटिएकाे बताए ।

आफुहरू आउने थाहा पाएर सडकमा पानी हालेर धुलो कम गराइएको बताउदै उनलेे यात्राको क्रममा फाट्टफुट्ट मात्रै काम गरेको पाइएको उल्लेख गरे ।

तीनदिन अघि नारायणघाटबाट सुरु भएको ११३ किलोमिटर पैदल यात्रा बुटवलको धागो कारखानामा आएर समापन भएको हो ।