काठमाडौँ — हाल नेपालमा मनसुनको न्यूनचापीय रेखा सरदर स्थानको आसपास अवस्थित छ । यस कारण देशभर सामान्यतया बदली रहेको मौसम पूर्वानुमान महाशाखाले जनाएको छ।

हाल कोशी, बागमती, गण्डकी र लुम्बिनी प्रदेशका केही स्थानमा मध्यम वर्षा भइरहेको छ भने बाँकी भूभागका एक–दुई स्थानमा वर्षा भएको छ। सोमबार देशका पहाडी भूभागका धेरै स्थान र मधेश प्रदेशसहित तराईका केही भागमा पनि मध्यम वर्षा हुने सम्भावना छ।

त्यसैगरी, कोशी, बागमती, गण्डकी र लुम्बिनी प्रदेशको पहाडी भूभागका एक–दुई स्थानमा भारी वर्षाको पूर्वानुमान गरिएको छ।

मौसम विज्ञहरूले वर्षाका कारण पहिरो, भू–क्षय र जल–जमावको जोखिम रहन सक्ने भन्दै सतर्क रहन आग्रह गरेका छन्।