काठमाडौँ — गत शुक्रबार र शनिबार परेको अविरल वर्षापछि आएको बाढीपहिरोमा परी मृत्यु हुनेको संख्या ६० पुगेको छ। प्रहरीका अनुसार मृतक मध्ये १९ पुरुष, २६ महिला र १५ नाबालक रहेका छन्।

सबैभन्दा बढी इलाममा जनधनको क्षति भएको छ। इलाममा मात्र ३७ जनाको ज्यान गएको छ। त्यस्तै पाँचथरमा ८, उदयपुरमा ३, खोटाङमा २, सुनसरीमा १, रौतहटमा ३, मोरङ, महोत्तरी, सिन्धुपाल्चोक र सिन्धुलीमा १/१ र काभ्रेपलाञ्चोकमा २ जनाको मृत्यु भएको प्रहरीले जनाएको छ।

प्राकृतिक विपत्तिका कारण मृत्यु हुनेको संख्या अझै बढ्न सक्ने अनुमान गरिएको छ, किनकि धेरै व्यक्ति अझै हराइरहेको प्रारम्भिक जानकारीमा उल्लेख छ।