बुटवल । प्रदेश ५ प्रदेश सभाको भौतिक पूर्वाधार तथा विकास समितिले विकासका आयोजनाहरु सम्पन्न गर्न ढिलाई भएकोमा सरकारको ध्यानाकर्षण गराएको छ ।

समितिको सोमवार सम्पन्न बैठकले प्रदेशमा सञ्चालनमा रहेका भौतिक पूर्वाधार विकास मन्त्रालय अन्तरगतका आयोजनाहरुको प्रगति विवरण मगाउने पनि निर्णय गरेको छ ।

समितिको बैठकमा भौतिक पूर्वाधार विकास मन्त्री वैजनाथ चौधरीले मन्त्रालयको चौमासिक प्रगति विवरण पेश गरेका थिए ।

मन्त्री चौधरीले बजेट कार्यान्वयन गर्ने संरचना र कर्मचारी अभावमा विकास खर्च हुन नसकेको भन्दै अबको दिनमा कामले गति लिने बताएका थिए ।

समिति सभापति आशा स्वर्णकारका अनुसार बैठकमा समितिको कार्यविधिका बारेमा सामान्य छलफल भएको र विस्तृत छलफल गरी अन्तिम रुप दिन उपसमिति गठन गरिएको छ ।

उपसमितिमा सांसदहरु नारायण प्रसाद आचार्य, उत्तर कुमार वली र फखरुद्दीन खान रहेका छन् ।