बुटवल
दुध खरिद गरेको रकम नदिएको भन्दै बुटवलका दुइ वटा डेरी पसलमा किसानहरूले धर्ना दिएका छन् ।

बुटवलको पाठक दुध डेरी र कस्तुरी मिष्ठान्न भण्डारले दुध खरिद गरेको किसानको रकम तिर्न ढिलाइ गरेपछि किसानहरुले धर्ना दिनुपरेको हो ।

रूपन्देहीको सैनामैना नगरपालिका साल्झण्डीस्थित सालझण्डी दूग्ध उत्पादक सहकारी संस्थालाई दुध बेचेका किसानहरु रकम नपाएपछि दुवै पसल अगाडि धर्ना दिएका हुन् ।

‘पटक पटक पैसाको माग गरेपनि कस्तुरी र पाठकले पैसा तिर्न आनाकानी गरेपछि धर्ना दिन बाध्य भएका हौ’ सहकारी संस्थाका अध्यक्ष तिलकराम घिमिरेले भने । उनका अनुसार कस्तूरी मिष्ठान्न भण्डार र पाठक दुध डेरीले गरी कुल २५ लाख ३० हजार ४ सय रकम किसानको दिन बांकी छ ।

कस्तुरी मिष्ठान्न भण्डारले १३ लाख ७० हजार ४ सय र पाठक दुध डेरीले ११ लाख ६० हजार तिर्न बांकी रहेको उनले बताए । पटक पटक चेक दिने तर पैसा नभएको चेक दिएर किसानलाई झुक्काउंदै आएकाले अनिश्चितकालीन धर्ना शुरु भएको उनीहरुको भनाइ छ ।

दुबै पसलले रकम दिने बाचा गरेपछि धर्ना टुंगिएको छ ।