बुटवल
चार दलीय समाजवादी मोर्चाले बुटवलमा लुम्बिनी प्रदेश स्तरीय सन्देश सभाकाे तयारी गरेको छ ।

नेकपा माओवादी केन्द्र, एकिकृत समाजवादी, नेत्रविक्रम चन्द विप्लव नेतृत्वको नेकपा र जनता समाजवादी पार्टीको समाजवादी माेर्चाले यही भदौ १२ गते बुटवलमा सन्देश सभा गर्नुकासाथै माेर्चाकाे प्रदेश स्तरीय नेतृत्व घोषणाको तयारी गरेको हो ।

मोर्चाले आईतबार बुटवलमा पत्रकार सम्मेलन गरी सन्देश सभाको तयारी बारे जानकारी गराएको हो ।

पत्रकार सम्मेलनमा नेकपा माओवादी केन्द्रका सचिव हितमान शाक्यले मुलुकको हित र विकासको लागि दलगत रुपमा समान धारणाको विकास गर्ने र अन्ततः पार्टी एकीकरण सम्मकाे योजना रहेको जानकारी दिए ।

उनलेे समाजवादी मोर्चा कसैका विरुद्ध नभई मुलुकको हित, प्रतिगमनका विरुद्ध, उपलब्धिको रक्षा, समाजवादको गन्तव्य तय गर्नको लागि गठन गरिएको बताए ।

माेर्चा गठनबाट अरु दल तर्सिनु नपर्ने उनको भनाइ थियो ।

उनका अनुसार बुटवल अन्तर्राष्ट्रिय सम्मेलन केन्द्रमा हुने सन्देश सभामा प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र नेपाल कम्युनिष्ट पार्टीका महासचिव नेत्रविक्रम चन्द विप्लव सहित मोर्चाका शिर्ष नेताले सम्बाेधन गर्ने कार्यक्रम रहेको छ ।

पत्रकार सम्मेलनमा नेपाल कम्युनिष्ट पार्टीका पोलिटव्युरो सदस्य बसन्त श्रेष्ठले देशको राजनितिक अबस्था फेरिएको र आन्दोलनका उपलब्धीमाथी प्रहार हुने सम्भावना बढ्दै गएका कारण प्राप्त उपलब्धिको रक्षा तथा राष्ट्रियता र मुलुकको समृद्धिका लागि माेर्चा गठन गरिएको बताए ।

बुटवलमा हुने लुम्बिनी प्रदेश स्तरीय सन्देश सभा व्यवस्थापनको जिम्मा नेकपाले लिएको छ । सोही अनुसार सभाको सबै तयारी अन्तिम चरणमा पुगेको नेकपा रूपन्देहीका इन्चार्ज शरद वलीले जानकारी दिए ।