तनहुँ — पृथ्वीराजमार्गअन्तर्गत तनहुँको बन्दीपुर गाउँपालिका–४ ठूलोढुङ्गामा आज साँझ भएको बस र माइक्रोबस दुर्घटनामा २१ जना घाइते भएका छन्।
दमौलीबाट मुग्लिनतर्फ जाँदै गरेको ग१ख ७३२९ नम्बरको बस र विपरीत दिशाबाट आउँदै गरेको बा ०१-००६ ख ६५०३ नम्बरको विद्युतीय माइक्रो एकआपसमा ठोक्किँदा बसमा सवार ११ र माइक्रोमा सवार १० जना घाइते भएको जिल्ला प्रहरी कार्यालय तनहुँले जनाएको छ।

घाइतेमध्ये केहीको परिचय खुलेको छ—तनहुँ व्यास–१० की २९ वर्षीया आशा दरै र २० महिनाकी साइन दरै, लमजुङकी गीता थापा कुँवर र उनकी छोरी अंशु कुँवर, नवलपरासीका विशाल लामिछाने, तनहुँका सोमबहादुर परियार, चितवनका पर्शुराम भट्टराई लगायत छन्।
त्यसैगरी, कास्की, म्याग्दी, महोत्तरी, नवलपुर र धादिङका यात्रुहरू पनि घाइते भएका छन्।

घाइतेहरूको उपचार पोखरा मणिपाल शिक्षण अस्पताल, चितवन मेडिकल कलेज र लक्ष्मी अस्पतालमा भइरहेको प्रहरीले जनाएको छ।