काठमाडौँ — देशभर मनसुनजन्य विपद्का कारण ज्यान गुमाउनेको संख्या ३९ पुगेको छ। सशस्त्र प्रहरी बलको प्रधान कार्यालय, हल्चोकका अनुसार कोशी प्रदेशमा मात्र ३६ र मधेश प्रदेशमा ३ जनाको मृत्यु भएको छ।

हालसम्म ११ जना बेपत्ता र १३ जना घाइते भएको विवरण प्राप्त भएको छ।

इलाममा पहिरोमा परी २७ जनाको मृत्यु भएको छ भने ५ जना बेपत्ता छन्। उदयपुरमा बाढी–पहिरोका कारण २ जनाको ज्यान गएको र एक जना घाइते भएका छन्। खोटाङमा चट्याङ लागेर एक जनाको मृत्यु र ३ जना घाइते भएका छन् भने भोजपुरमा चट्याङबाट २ जना घाइते भएका छन्। पाँचथरमा भएको सवारी दुर्घटनामा ६ जनाको मृत्यु र ६ जना घाइते भएका छन्।

मधेश प्रदेशअन्तर्गत रौतहटमा चट्याङ लागेर ३ जनाको मृत्यु भएको छ। अन्य जिल्लामध्ये बारामा १, रसुवामा ४, काठमाडौंमा १ जनालाई नदीले बगाएको र मकवानपुरमा चट्याङ लागेर एक जना घाइते भएको जनाइएको छ।