काठमाडौं,  आजदेखि देशभर माध्यमिक शिक्षा परीक्षा एसईई सुरु हुँदै छ।

उत्तरपुस्तिका परीक्षणसमेत आजैदेखि सुरु गरिँदै छ । वैशाख मसान्तसम्ममा नतिजा प्रकाशन गर्ने तयारी छ ।

यस पटक ५ लाख १२ हजार ४ सय २१ विद्यार्थीले एसईई दिँदै छन्।

२ लाख ५७ हजार ६ सय १३ छात्रा, २ लाख ५४ हजार ८ सय १ छात्र र ७ जना अन्य परीक्षार्थी रहेको परीक्षा नियन्त्रक टुकराज अधिकारीले जानकारी दिए ।

१ हजार ९ सय ६६ परीक्षा केन्द्र तोकिएको छ । जापानको एभरेस्ट स्कुलबाट २३ विद्यार्थीले परीक्षा लेख्दै छन् ।

उत्तरपुस्तिका परीक्षा केन्द्रमै परीक्षण गराउने कि इकाइमा ल्याएर परीक्षण गर्ने भन्नेमा निर्णय गर्ने अधिकार सम्बन्धित इकाइलाई नै दिइएको छ ।

केन्द्राध्यक्ष, सहायक केन्द्राध्यक्ष, निरीक्षक, सहयोगी र सुरक्षाकर्मी गरी परीक्षामा साढे ७३ हजार जनशक्ति परिचालन हुने परीक्षा नियन्त्रक अधिकारीले बताए ।

उनका अनुसार उत्तरपुस्तिका परीक्षा केन्द्रमा नै परीक्षण गरिने भएको छ । उत्तरपुस्तिका परीक्षण बिहीबारै सुरु हुनेछ । परीक्षा सकिएको विषयको उत्तरपुस्तिका तीन दिनभित्र परीक्षा केन्द्रमा नै परीक्षण गर्ने व्यवस्था मिलाउने निर्णय राष्ट्रिय परीक्षा बोर्डले गरेको शिक्षा सचिव चूडामणि पौडेलले जानकारी दिए ।

यसअघि उत्तरपुस्तिका इकाइले केन्द्रबाट संकलन गरी अन्तरजिल्ला र प्रदेशमा परीक्षण गर्ने व्यवस्था मिलाइन्थ्यो। कु

न परीक्षा केन्द्रको उत्तरपुस्तिका कहाँ परीक्षण हुने भन्ने खुल्दैनथ्यो । तर त्यसरी परीक्षण गर्दा नतिजा प्रकाशन गर्न साढे दुई महिनाभन्दा बढी समय लाग्ने गरेको थियो। तर यस पटक शिक्षामन्त्री सस्मित पोखरेलले एक महिनाभित्रै नतिजा प्रकाशन गर्न निर्देशन दिएपछि बोर्डले परीक्षा केन्द्रमै उत्तरपुस्तिका परीक्षणको व्यवस्था मिलाएको हो ।

अपांगता भएका, सुत्केरी र किरियापुत्री परीक्षार्थीका लागि केन्द्राध्यक्षले सहजीकरण गर्न सक्ने व्यवस्था मिलाइएको छ ।

एसईई २९ चैतमा सकिनेछ । गत ७ माघमा सार्वजनिक गरिएको तालिकाअनुसार पहिलो दिन अनिवार्य अंग्रेजी विषयको परीक्षा हुनेछ । २० चैतमा अनिवार्य नेपाली, २२ चैतमा अनिवार्य गणित, २३ चैतमा विज्ञान तथा प्रविधि, २४ चैतमा सामाजिक अध्ययन, २५ चैतमा ऐच्छिक प्रथम खण्डका सबै विषय, २६ चैतमा ऐच्छिक द्वितीय खण्डका सबै विषयको परीक्षा हुने तालिका छ । २७, २८ र २९ चैतमा प्राविधिक धारका बाँकी विषयको परीक्षा हुनेछ ।

नियमित तथा ग्रेडवृद्धि दुवै समूहको परीक्षा यही तालिकाअनुसार हुनेछ। परीक्षा बिहान ८ देखि ११ बजेसम्म सञ्चालन हुनेछ। परीक्षा हलमा मोबाइल, स्मार्ट घडी जस्ता ब्लुटुथ चिप्स प्रयोग हुने विद्युतीय उपकरण प्रयोग गर्न पाइनेछैन।

अपांगता भएका, सुत्केरी र किरियापुत्री परीक्षार्थीका लागि केन्द्राध्यक्षले सहजीकरण गर्न सक्ने व्यवस्था मिलाइएको छ । बोर्डको क्यालेन्डरअनुसार चैत पहिलो सातादेखि एसईई हुनुपर्ने हो ।

तर २१ फागुनको प्रतिनिधिसभा निर्वाचनका कारण कार्यतालिका पछि सारिएको थियो । एसईईपछि कक्षा ११ मा भर्ना हुन सञ्चालन गरिने प्रवेश परीक्षा तयारी कक्षा र ब्रिजकोर्स कक्षामा सरकारले यस पटकदेखि रोक लगाएको छ।

ढिलो गरी नतिजा प्रकाशन, कक्षा ११ मा भर्नाको तयारी लगायतका कारण विद्यार्थीमा मनोवैज्ञानिक असर पर्दै आएकाले छिटो नतिजा ल्याउने र भर्ना तयारी कक्षा सञ्चालनमा रोक लगाउने निर्णय भएको शिक्षामन्त्री पोखरेलको भनाइ छ।