बुटवल – प्रथम ज्ञानपुञ्ज जिल्ला स्तरीय अन्तर–विद्यालय सेभेन ए साइड फुटबल प्रतियोगिता–२०८३ को उपाधि नबिन औद्योगिक कदर बहादुर रीता माध्यमिक विद्यालयले जितेको छ।

मंगलबार देवीनगरस्थित एन्फा टेक्निकल सेन्टरमा भएको फाइनलमा नबिन औद्योगिकले सैनामैना पर्रोहा माध्यमिक विद्यालयलाई १–० गोल अन्तरले पराजित गर्दै उपाधि हात पारेको हो। नबिनको जितमा खेल सुरु भएको पहिलो मिनेटमै निलेस शाहीले गरेको आकर्षक गोल निर्णायक बन्यो। शाही फाइनल खेलको प्लेयर अफ द म्याच घोषित भए।

उपाधिसँगै नबिन औद्योगिकले नगद ५१ हजार रुपैयाँ, कप, मेडल र प्रमाणपत्र प्राप्त गरेको छ। उपविजेता सैनामैना पर्रोहा माविले नगद ३१ हजार रुपैयाँसहित कप, मेडल र प्रमाणपत्रमा चित्त बुझायो।

प्रतियोगितामा नबिन ‘बी’ का बिप्लव गुरुङ उत्कृष्ट गोलकिपर, नबिन ‘ए’ का कुन्ज गुरुङ उत्कृष्ट डिफेन्डर तथा सैनामैना पर्रोहाका सुभाष नेपाली प्लेयर अफ द टुर्नामेन्ट घोषित भए।

पुरस्कार वितरण समारोहमा एन्फा रुपन्देहीका महासचिव हिमाल गौचन, विद्यालय व्यवस्थापन समितिका अध्यक्ष रामप्रसाद भट्टराई, प्राचार्य शंकर भण्डारी तथा सिद्धार्थ केबलकारका प्रबन्धक नरबहादुर कार्कीले विजेता, उपविजेता तथा उत्कृष्ट खेलाडीलाई पुरस्कार प्रदान गरे।

फाइनल खेलको शुभारम्भ गर्दै बुटवल उपमहानगरपालिकाका उपप्रमुख सावित्रादेवी अर्यालले बुटवलले खेलकुद विकासका लागि करिब ४ करोड रुपैयाँ बराबरको बजेट विनियोजन गरेको बताइन्। उनले शिक्षा, स्वास्थ्य, खेलकुद र महिला सशक्तीकरणको क्षेत्रमा बुटवल अब्बल रहेको दाबी गरिन्।

भदौ १ गतेदेखि सुरु भएको प्रतियोगितामा रुपन्देहीका विभिन्न विद्यालयका ४४ टोलीको सहभागिता रहेको थियो।