बुटवल ।नेपाली कांग्रेसका केन्द्रीय सदस्य बालकृष्ण खाँणले विप्लव नेतृत्वकाे नेकपालाई शान्ति प्रकृयामा ल्याउन सरकार गम्भीर बन्नुपर्ने बताएकाछन् ।

उनले वार्ता र संवादको ढोका बन्द गर्न नहुनेमा जोड दिए । उनले विप्लवलाई पनि वार्ता र सहमतिबाटै समाधान खोज्न आग्रह गरे । मुलुकले फेरि अर्को द्वन्द्व थेग्न नसक्ने उनले उताए ।

प्रेस युनियन रुपन्देहीले शनिबार बुटवलमा गरेको पत्रकार भेटघाटमा कांग्रेस प्रमुख सचेतक खाँणले, सरकारले विप्लवलाई निषेधको राजनीति गरिहाल्ने अवस्था नरहेको बताए ।

सिके राउतसँग भएका सहमतिका बुँदाहरुमा अस्पष्टता रहेको भन्दै उनले राउतले भनेजस्तै मुलुकलाई खण्डित गर्ने विषयमा जनमत संग्रह हुनै नसक्ने प्रष्ट पारे ।

संविधानमा नभएका कुराहरुमा पनि सरकारले प्रतिवद्धता गरेजस्तो सहमतिका बुँदामा रहेको बताए । सरकार र सिके राउतको धारणा समान आउनुपर्ने खाँणले माग गरे ।

सहमतिको अर्को दिन सिके राउतका कार्यकर्ताले जनकपुरमा गरेको प्रदर्शन र नाराहरुले पनि आशंकाहरु बढेको उनले उल्लेख गरे ।

युनियनका रुपन्देही सभापति रेखा भुसालको सभापतित्व र उपसभापति कबिन्द्र नेपालको सञ्चालनमा पत्रकार सम्मेलन भएको थियो ।