बुटवल – बुटवल–बेलहिया ब्यापारिक मार्ग विस्तार आयोजनाले चौराह–चिडियाखोला सडक सीमाभित्र पर्ने मापदण्ड बिपरितका घरमा  डोजर चलाएर भत्काउन सुरु गरेको छ ।

आयोजनाले गएको शुक्रबार २४ घण्टे सुचना जारी गर्दै घरधनीहरुलाई आफैं घर भत्काउन निर्देशन जारी गरेको थियाे।

बुटवलको राजमार्ग चौराहादेखि गोलपार्कसम्मको सडक ६ लेनको बनाउने क्रममा केही घरधनीले अदालतमा मुद्दा हालेपछि सडक विस्तारको काम डेढ वर्षदेखि रोकिएको थियो ।आज विहानै आयोजनाले ट्रफिक चोकमा रहेका १२ वटा घरमा डोजर चलाएको हो । सडक खण्डमा ३१० घर र बाँकी ४७ खाली जग्गा गरी ३५७ जनाले सडक क्षेत्र मिचेकोमा २ सय जनाभन्दा बढीले यसअघि नै घर भत्काइसकेका छन ।

सर्बोच्च अदालतका न्यायधिसद्वय सपना प्रधान मल्ल र डा. मनोज कुमार शर्माको संयुक्त ईजलासले यसअघिको सर्बोच्चको अल्पकालिन आदेशलाई  निरन्तरता दिनु नपर्ने ठहर गरेसँगै आयोजनालाई बाटो सडक विस्तार गर्ने बाटो खुलेको थियो ।

आयोजना प्रमुख जयलाल मरासिनीले सूचना जारी गर्दापनि केही घरधनीहरुले भत्काउन नमानेपछि आयोजनाले नै डोजर चलाएको बताए । आइतबार एकाविहानै आयोजनाले आफ्ना घरहरुमाथि डोजर चलाएपछि घरधनीहरु निकै आक्रोसित देखिन्थे ।