काठमाडौं – नेकपा माओवादी केन्द्रको आठौं महाधिवेशन जारी छ । तीन दिनअघि नै महाधिवेशनको टुंगो लाग्ने भनिए पनि एकपछि अर्को दिन गर्दै महाधिवेशन लम्बिदै गएको छ ।

बन्दसत्रमा आज उम्मेदवारी दर्तासँगै मतदान पनि गरिने कार्यसूची छ । जारी महाधिवेशका क्रममा संशोधन गरिएको निर्वाचन कार्यतालिका अनुसार आज दिउँसो २ देखि साढे ३ बजेसम्म उम्मेदवारी दर्ता गर्ने समय तोकिएको छ ।

निर्वाचन कार्यतालिकाअनुसार उम्मेदवारको मनोनयन पत्र दर्ता सूची ३ बजेर ४० मिनेटमा प्रकाशन हुनेछ । अपराह्न ४ बजे उम्मेदवारको विरोधमा उजुरी, ४ बजेर ४० मिनेट जाँदा उम्मेदवारको नामावली पुनः प्रकाशन, साँझ साढे ५ बजे उम्मेदवारी फिर्ता र साँझ पौने ६ बजे उम्मेदवारको अन्तिम नामावली प्रकाशन गरिने निर्वाचन कार्यतालिकामा उल्लेख छ ।

यस्तै साँझ ६ बजेर २५ मिनेटदेखि १० बजेर २५ मिनेटसम्म नेतृत्व चयनका लागि मतदान हुने माओवादी केन्द्र निर्वाचन समितिले जानकारी दिएको छ ।