गुल्मी – गुल्मीमा बिहीवार छुट्टाछुट्टै घटनामा दुई जनाकाे ज्यान गएको छ । ज्यान जानेमा मालिका गाउँपालिका–३ का ७० वर्षीय नन्दे बिक र मुसिकोट नगरपालिका–४ डाँडाथोककी ३६ वर्षीया फुलकुमारी नेपाली रहेका छन् ।

मालिका–३ का नन्दे बिककाे आज दिउँसो स्थानीय पासे खाेलाकाे माेटरबाटाेबाट खसेर ज्यान गएकाे जिल्ला प्रहरी कार्यालय गुल्मीका प्रहरी नायब उपरीक्षक (डीएसपी) डिल्लीनारायण पाण्डेले जानकारी दिनुभयाे । उहाँ आफन्तसँग भेटघाटका लागि बुधवार वडा नम्बर २ काे दर्लिङ जानुभएकाे र रातिसम्म घर नफर्केपछि खोजीका क्रममा मृत अवस्थामा भेटिनुभएकाे हाे ।

त्यसैगरी आज बिहान आफ्नी छोरी र छिमेकीसहित स्थानीय ढुंगेठाँटी हर्लेखानी सामुदायिक वनमा घाँस काट्न जानुभएकी मुसिकोट–४ की  फुलकुमारी नेपालीको घाँस काट्ने क्रममा भिरबाट लडेर ज्यान गएको छ । भिरबाट लडेकी नेपालीको घटनास्थलै ज्यान गएको जिल्ला प्रहरी कार्यालय गुल्मीले जनाएकाे छ ।