बुटवल,

भारतबाट भन्सार छलेर ल्याइएको झन्डै ३ हजार कुखुरा भन्सार कार्यालयको पशु क्वारेन्टाइनले नष्ट गरेको छ । अबैध बाटो हुँदै ल्याइएका तीन गाडी कुखुरा स्थानीयले पक्राउ गरी प्रहरीलाई बुझाएपछि क्वारेन्टाइनमार्फत कुखुरा नष्ट गरिएको रुपन्देही प्रहरीले जनाएको छ ।

रूपन्देहीको कञ्चन गाउँपालिका–१, हात्तीबजारमा लु २ च ४८६१, बुटवल उपमहानगरपालिका–१४ बेलभरियामा लु २ च ६९०३ र देवदहमा लु १ च ५८९६ नम्बरको बलेरो गाडीसहित
स्थानीयले कुखुरा पक्राउ गरेका थिए ।

स्थानीय युवाहरूले पक्राउ गरेका कुखुरासहितका गाडी सालझण्डी, बुटवल र देवदह प्रहरी चौकीलाई बुझाइएको तामनगरका युवा ईश्वर सुवेदीले बताए । तीनवटै प्रहरी युनिटले पक्राउ परेका गाडीसहितका कुखुरा क्वारेन्टाइन चेकपोस्टमा पठाएको थियो ।अनुसन्धानमा खरिद बिलबिना भन्सार छलेर ल्याइएको देखिएपछि क्वारेन्टाइनले कुखुरा नष्ट गरी गाडी भन्सार चलान गरेको रुपन्देही प्रहरीका निमित्त प्रवक्ता प्रहरी निरीक्षक किशोर केसीले बताए ।