नेपाल विद्युत प्राधिकरणका कार्यकारी निर्देशक हितेन्द्रदेव शाक्य र निवर्तमान कार्यकारी निर्देशक कुलमान घिसिङको रिट सर्वोच्च अदालतका न्यायाधीश अब्दुल अजीज मुसलमानको इजलासमा परेको छ।

शुक्रबार न्यायाधीश मुसलमानको एकल इजलासमा दुबै मुद्दाको सुनुवाइ हुन लागेको हो।

गत सोमबार मन्त्रिपरिषद्को बैठकले प्राधिकरणको कार्यकारी निर्देशकबाट कुलमानलाई बर्खास्त गरी हितेन्द्रदेवलाई नियुक्त गरेको थियो।

घिसिङले आफूलाई सरकारले गैरकानुनी रूपमा बर्खास्त गरेको भन्दै बिहीबार रिट दायर गरेका थिए।

शाक्य पनि आफू यसअघि कार्यकारी निर्देशकको पदमा चार वर्षका लागि नियुक्त भएको भन्दै पारिश्रमिक र सुविधा पाउनुपर्ने माग गर्दै अदालत पुगेका थिए।

ती दुवै मुद्दालाई एउटै बेन्चले शुक्रबार सुनुवाइ गर्न लागेको हो।